TRF2 boʻlmasa, shikastlangan mushak yogʻ va chandiq toʻqimasi bilan toʻladi
Olimlar TRF2 oqsili mushak ildiz hujayralarining toʻqimani tiklash qobiliyatini saqlashini aniqladi. U boʻlmaganda, sichqonlarda shikastlangan mushaklarning oʻrnini yogʻ va chandiq toʻqimasi egalladi.

Pensilvaniya universiteti Perelman tibbiyot maktabi tadqiqotchilari TRF2 xromosoma uchlarini himoyalashdan tashqari, mushak ildiz hujayralari oʻzligini saqlashi uchun ham zarurligini aniqladi. Natijalar Science Advances jurnalida eʼlon qilindi.
Odatda bu hujayralar koʻp vaqtini nofaol holatda oʻtkazadi. Jarohatdan keyin ular koʻpayib, mushaklarni tiklashda qatnashadi, soʻng ularning bir qismi tinch holatga qaytadi. Tajribalarda olimlar TRF2 faolligi hujayralar bu bosqichlar oʻrtasida oʻtishi davomida oʻzgarishini aniqladi.
Laboratoriya sichqonlarining mushak ildiz hujayralaridan oqsil olib tashlanganda, dastlab hayvonlarning mushaklari normal koʻrindi. Keyin funksional hujayralar soni kamaydi. Bunda hujayralar nobud boʻlmagan, balki mushak ildiz hujayralari boʻlib qolish imkonini beruvchi molekulyar dasturini yoʻqotgan.
Toʻqima shikastlangach, sogʻlom mushakning oʻrnida normal faoliyatni tiklamaydigan yogʻ va chandiq toʻqimasi toʻplana boshladi. Dyushenn mushak distrofiyasining sichqon modelidagi alohida tajribada esa TRF2 yoʻqligi mushaklar degeneratsiyasini tezlashtirib, hayvonlarning umrini qisqartirdi.
Olimlar oqsil genomning boshqaruvchi qismlari bilan bogʻlanishini aniqladi; bu qismlarning koʻpchiligi maxsus DNK tuzilmalari — G-kvadruplekslarni oʻz ichiga oladi. Tadqiqotchilar TRF2 ushbu tuzilmalar orqali mushak ildiz hujayralari faoliyati uchun zarur faol genlar majmuasini saqlashini aniqladi.
Mualliflar bu mexanizm mushak distrofiyasini davolashning kelajakdagi usullarini izlash hamda mushaklarning tiklanishi bilan saraton rivojlanishi oʻrtasidagi farqlarni oʻrganishga yordam berishi mumkin, deb hisoblaydi. Tadqiqot odamlarni davolash imkonini hozircha isbotlamaydi: natijalarni klinik amaliyotga oʻtkazish mumkin yoki yoʻqligini olimlar tekshirishi kerak.





