Reklama
Biznesingiz uchun Telegram’da reklama · TCA Media
Dushanba, 16-noyabr 2026-yil
Asosiy yangiliklar.
Reklama
Biznesingiz uchun Telegram’da reklama · TCA Media
Jamiyat

Energetik ichimliklar bilan bogʻliq yurak toʻxtashi holatlari 11 baravar koʻpaydi

FDA maʼlumotlar bazasidagi xabarlarning dastlabki tahlili kofeinli ichimliklar va stimulyatorlar ogʻir yurak hodisalarining koʻproq uchrashi bilan bogʻliqligini koʻrsatdi. Tadqiqot sababiy bogʻliqlikni isbotlamaydi.

12-noyabr, 12:28По-русски

Read in English

Tadqiqotchilar 2017–2025-yillarda FDA maʼlumotlar bazasiga kelib tushgan ehtimoliy nojoʻya hodisalar haqidagi 28 345 ta xabarni oʻrgandi. Ularning 854 tasida energetik ichimliklar yoki kofein va boshqa stimulyatorlar boʻlgan qoʻshimchalar tilga olingan, qolgan xabarlar esa taqqoslash uchun ishlatilgan.

Yurak toʻxtashi bunday mahsulotlar haqidagi xabarlarda stimulyatorlar boʻlmagan mahsulotlar haqidagi xabarlarga qaraganda taxminan 11 baravar koʻproq uchragan. Infarkt haqidagi qaydlar taxminan 4,5 baravar, qorinchalar aritmiyasi va yurak urishining tezlashishi haqidagi qaydlar esa taxminan toʻrt baravar koʻproq boʻlgan. Koʻkrak qafasidagi ogʻriq 2,71 baravar koʻproq qayd etilgan, hushdan ketish esa taxminan ikki baravar koʻp uchragan.

Kofein va stimulyatorlar bilan bogʻliq yurak-qon tomir hodisalari haqidagi xabarlarning qariyb 45 foizi 18 yoshdan 34 yoshgacha boʻlgan odamlarga tegishli edi. Erkaklar va ayollar orasida oʻxshash koʻrsatkichlar kuzatilgan. Tadqiqotchilar bu yosh guruhida bunday xabarlar ulushi nima sababdan yuqori boʻlganini hozircha aniqlamadi. Ular ehtimoliy izohlar qatorida mahsulotlarni tez-tez isteʼmol qilish, ularni intensiv mashgʻulotlardan oldin qabul qilish, alkogol yoki giyohvand moddalar bilan aralashtirish, shuningdek, aniqlanmagan yurak kasalliklarini sanab oʻtdi.

Natijalar Amerika yurak assotsiatsiyasining ilmiy sessiyasida dastlabki tadqiqot sifatida taqdim etildi. Bunday uchrashuvlarda taqdim etiladigan tezislar taqrizdan oʻtkazilmaydi, FDAʼga yuborilgan ixtiyoriy xabarlar tahlili esa yurak hodisalariga aynan mahsulotlarning oʻzi sabab boʻlgan-boʻlmaganini aniqlash imkonini bermaydi. Olimlar qoʻshimcha tadqiqotlar oʻtkazish hamda stimulyatorlar boʻlgan ichimliklar va qoʻshimchalarning xavfsizligini muntazam kuzatib borish zarurligini bildirdi.

Reklama
Biznesingiz uchun Telegram’da reklama · TCA Media