Tadqiqot diskalkuliyali bolalar miyasi faoliyatidagi xususiyatlarni aniqladi
Stenford tadqiqotchilari diskalkuliyali bolalar yechish strategiyalarini sekinroq almashtirishi va murakkablik oʻzgarganda kamroq moslashishini aniqladi.

Stenford universiteti tadqiqotchilari 8–10 yoshdagi 68 nafar bolani oʻrganib, ularning matematik masalalarni yechish usullari va bu jarayon bilan bogʻliq miya faoliyatini taqqosladi.
Rivojlanish diskalkuliyasi — matematik masalalarni yechishda doimiy qiyinchiliklar bilan bogʻliq holat — boʻlgan bolalar bu holat kuzatilmagan tengdoshlariga qaraganda turli strategiyalardan yomonroq foydalandi. Ularga bir yechish usulidan boshqasiga oʻtish uchun koʻproq vaqt kerak boʻldi, masala murakkabligining oʻzgarishi esa ularning tanloviga kamroq taʼsir koʻrsatdi.
Vaqt oʻtishi bilan diskalkuliyasi boʻlmagan bolalar mos strategiyalarni tanlashda samaraliroq boʻldi. Bunday yaxshilanish diskalkuliyali bolalarda kuzatilmadi. Bu ularda nafaqat hisoblash, balki yechish usulini tanlashda ham qiyinchiliklar borligini koʻrsatadi.
Olimlar, shuningdek, miyaning muayyan tizimi faoliyatida farqlarni aniqladi. Bu xususiyatlar bolalarning qanchalik yaxshi hisoblagani va strategiyalar oʻrtasida almashganiga bogʻliq boʻlib, ayrim koʻrsatkichlar ularning qobiliyatlarini bashorat qilish imkonini berdi.
Tadqiqotchilar natijalarni diqqat, xotira va kognitiv moslashuvchanlik — sharoit oʻzgarganda fikrlash yoki harakatlar yoʻnalishini almashtirish qobiliyati — bilan bogʻlaydi. Bu jarayonlar ijro funksiyalariga kiradi: ular axborotni yodda saqlash, diqqatni jamlash va tanlangan yondashuv ishlamasa, rejani oʻzgartirishga yordam beradi.
Shu bilan birga, natijalar miya faoliyatidagi farqlar diskalkuliyaga bevosita sabab boʻlishini isbotlamaydi. Mualliflar bu buzilish bitta umumiy muammo bilan emas, balki oʻzaro taʼsirlashuvchi bir nechta kognitiv va neyron jarayonlar bilan bogʻliq boʻlishi mumkinligini taʼkidlaydi. Tadqiqot JNeurosci jurnalida chop etildi.





