Toshkent tumanlaridan biri kun boʻyi elektrsiz qoldi
Bugun, 9 noyabr kuni, poytaxtning Bektemir tumanidagi hududning bir qismida elektr taʼminoti uzildi.

Bektemir tumanidagi bir nechta mahalla aholisi dushanbani elektrsiz oʻtkazishiga toʻgʻri keladi. Elektr 9 noyabr kuni ertalab oʻchgan, uni faqat soat 17:00 gacha tiklash vaʼda qilinmoqda.
Bunga elektr uzatish liniyasi yangilanayotgan «Musaffo» fideridagi ishlar sabab boʻlgan. Bu haqda tuman hokimligida maʼlum qilindi. Elektr taʼminotidagi uzilish «Zabardast», «Musaffo», «Nurli yoʻl», «Oltintopgan» va «Sohil» mahallalariga taʼsir qilgan, biroq ular toʻliq emas, faqat ayrim koʻchalari elektrsiz qolgan.
Ular orasida A. Ikromova, Amir Temur, Bektemir shoh, Maydon, Marvarid, Navbahor, Navqiron, Nurofshon, Rohat, Sokin, Tafakkur, Tomorqa, Hislat, Charogʻon, Chinor, Shodena, Shodlik, Yashil vodiy va Ziyoli koʻchalari bor. Bundan tashqari, J. Toshkandiy va Hovli bogʻ koʻchalaridagi bir nechta xonadon ham elektrsiz qolgan.
Tumandagi noqulayliklar shu bilan tugamadi. «Rohat-1» boshqa fiderida avariya yuz bergani sababli «Gulbogʻ» va «Iyk ota» mahallalarining bir qismida elektr taʼminoti beqaror boʻlib qolgan.





